حــــــبك ظهـــر

عدد المساهمات : 94 تاريخ التسجيل : 14/07/2009

زى الندى
ما يبل ريق الورد فى قدوم السحر
ويحن ع الجدب اللى طال
ويمد ايده للنهار
و يخلص البسمة اللى منسية
ف تشابيك الشجر
حبك ظهر
و كانه شمس اتجملت لحظة شروق
عدت على المر اللى ساكن فى الحلوق
و بأمر سحرى قالتله احلى
فأتمر
زى الأمل
لما يعمر قلب يائس محترف
يأسه ف شرايينه انتشر
قام بدل المجرى الكئيب
بمسار يعدى فيه القمر
زى الخضار
لما بيحضن عين ما شافت غير سواد
بعد طوفة فى البلاد
فارتاحت النفس اللى تقلانه هموم
و شبعت العين م النظر
زى المطر
من غير معاد
ينزل يغطى الأرض خير
و يكون سبيل
ندعى ذنوبنا تغتفر
قلبى افتكر
هيعيش سنينه جعان يحلم بسوق العيش
بيعانى مش عارف يعيش
ما عرفشى انه
بس عايش
منتظر
الميه جريت فى الصحارى فارتوت
تجاعيد سكونى اتحركت و اتلولوت
و الغمازات اتكونت
و طابع الحسن اتحفر
ااخرعجب
حتى العيون وسعت و شافت صورة أكبر
من حدود دنيا البشر
السحر فى الأرض انتشر
لكنه للحب اتوهب
يشعل ما بين اتنين لهب
لو تنطفى الشمس اللى ساكنه فى الأعالى
ما ينطفى
و لا يختفى
ما دام ظهر
مع تحياتى

لكل عشاق المنتدى

ماندو حبيب الجماهير

شكرا ليك يا ماندو على التوبيك الرائع دا وشد حيلك وورينا همتك

منورنا كمان
تقبل مرورى