أنا بجد أتخنقت من الأعضاء والجماهير والإعلام اللى قليل ماتلاقى حد فاهم فيهم حاجة..
أمبارح بعد ماتش رواندا والفوز المتعثر على أحد أضعف الفرق الأفريقية على الإطلاق كتبت موضوع قلت فيه وجهة نظرى بصراحة عن أحوال المنتخب وعن أن بالعرض ده فرص منتخبنا فى المونديال بقت شبه مستحيلة ولاقيت معظم الردود بتتهمنى بالخيانة وبعد كده الإشراف قفل الموضوع لسبب أنا مش فاهمه لحد دلوقتى.
الصبح وقفت بصيت على عناوين الجرائد لقيت جريدة كاتبه بالبنط العريض (عبرنا رواندا عنق الزجاجة)!!!!!!!....مش فاهم زجاجة أيه بالظبط لكن المهم أننا عدينا العنق بتاعها.
مدحت شلبى أمبارح بيقول والله حاسسها والله شاممها جنوب أفريقيا...كل ده عشان الهدف الثالث فى مرمى فريق ممكن فرقة زى حرس الحدود تعلم عليه مستريح قوى 6 ولا 7.
وأنا فى الكلية قابلت واحد معانا فى المنتدى أسمه إسلام قولتله إيه الهبل اللى كان فى المنتدى أمبارح ده بعد الماتش الناس فرحانه على أيه...قام قايللى سيبك منهم أصلهم نفسهم يعيشوا اللحظة بس.
يا جماعة إعلامنا وصحافتنا متخلفين عقليا لما نكسب المانشتات جاهزة ولما نخسر برضه جاهزة وبدون أى تحليل لأى أداء أو مستقبل للفرقة...وطبعا جمهورنا أكتسب كتير قوى من جهل الإعلام عندنا وبقى بيتكلم بالنتائج بس.. بدون الحكم على واقع ملموس.
واقع أن الجزائر راكبه المجموعة من دلوقتى ولسالها ماتشين مع رواندا وزامبيا فى أرضها والجزائر هتخلص الأتنين مستريح.
وأننا عندنا ماتشين مع نفس الفرقتين بره مصر وأننا مبنعرفش نكسب بره أرضنا إلا فيما ندر.
والتجربة بتقول أن فيه فرق بتصنعها مباريات...ومنتخب مصر صنعته بطولة 2006 اللى فيها عرفنا تريكة والحضرى وعمرو زكى بجد
وكمان فيه فرق بتهدها مباريات زى تونس 2006 لما خسرت من غينيا بثلاثية فى المكس وكانت نهاية جيل تونسى محترم جدا.
وده اللى حصل معانا ماتش زامبيا كان نهاية فريق وبعده ظعرت مشاكل رهيبة فى الفرقة.
وماتش الجزائر كان بداية فرقة جزائرية شابة مش هتفوت فرصة زى ديه للتأهل للمونديال.
آخر الكلام أنا بقول الى مقتنع بيه وبس..بغض النظر عن أى عصبية وناس عايزة تتعارك وخلاص...مسألة التأهل لكأس العالم بقت صعبة جدا...وياريت متطالبوش الفرقة بيها كل شوية عشان نخفف من عليهم أى مطالب بالتأهل وديه نفس الظروف اللى كننا بنكسب بيها أى كأس قارية.
اللى عايز يقتنع بالكلام ده من دلوقتى يقتنع واللى مش عايز يستنى كام شهر وهيشوف كل حاجة بعينه وياريت أكون أنا اللى غلطان.
الثلاثاء يوليو 07, 2009 2:52 pm