إيه رأيك لوذهبنا فى رحلة إلى أى جامعة
مصرية ونشوف جو الكلام هناك عامل إزاى ؟؟ ياللا بينا نروح ونشوف مع بعض إيه إللى بيحصل ؟؟؟؟ أول ما حنخش أى كلية فى مصر حنلاقى فى زحمة جامدة كيك أولاد وبنات بالهبل كتير أوى أوى لكن طبعاً البنات أكتر من الأولاد بكتير ... طبعاً التعليم هناك شىء من الكماليات يعنى الطلبة بعض ما يخلصوا حوارات والحيكى والميكى والتوتو ممكن يفكروا يحضروا محاضرات .... يعنى مثلاً عندك دفعة تجارة فى أى سنة فى أى كلية عدد طلابها فى إنتظام بس حوالى ألفين طالب لكن إللى بيحضروا أقل من ألف بكتير وطبعاً فى مصلحة التعليم لأنهم لو حضروا مفيش أصلاً مكان ليهم فى المدرج ... المهم دلوقتى إن مفيش حد بيحضر يعنى اللى بيحضروا المحاضرات ميجبش تلت عدد الطلبة .. يبقى إحنا عرفنا إن المحاضرات محدش بيحضرها إمال الطلبة والطالبات الكتير الموجودين بيجوا الكلية ليه؟؟؟ أقولك أنا يا سيدى الجامعة دلوقتى بقت مكان مش للتعليم لأن بتذاكر أخر شهر ويمكن أخر أسبوع أو حتى قبل الأمتحان بساعة علشان كده مبيحضروش المحاضرات من أول السنة ولكن بيروحوا الكلية كل يوم ويقعدوا فيها من الساعة تمانية الصبح لحد تمانية بليل بس مبيحضروش محاضرات ولكن بيقعدوا يحاواروا البنات والأولاد مع بعض وده طبعاً ناتج بسبب الفراغ النفسى العاطفى وعدم وجود حياة شخصية عاطفية للطلبة وبسبب كده بقوا يزوغوا من المحاضرات وبذلك أصبح الطلبة والطالبات بيقضوا وقت طويل مع بعض فى حديقة الجامعة التعليمية الغراء .... يعنى من الأخر الجامعة اتقلبت نادى إجتماعى عشان الطلبة يقابلوا فيه بعض ... يعنى نظام الجامعة بقى نظام حوارات .... يعنى الولد بيروح يحور مع أكبر عدد من البنات والبنت تروح تحور مع أكبر عدد من الأولاد ويفضل مرة نظام الحوار شغال لحد مافى مرة الحوار يكبر وممكن يقلب بحب ... وطبعاً الحوارات أنواع وكل حوار وليه غرض يعنى مفيش حاجة من أجل الله والوطن ..يعنى لما نبص للبنت نلاقيها بتحور مع أولاد عشان كذا حاجة ومنها إن الولد ممكن يكون وسيم فالبنت بتحور معاه على أمل إنه يحبها وممكن يتجوزها وتكيد بيه أقاربها وأصحابها البنات وممكن تحور مع ولد دحيح يعنى شاطر كيك عشان تاخد منه محاضرات وملخصات وهكذا وممكن تحبه أو يفضلوا أصحاب وبس وممكن تحور مع ولد دمه خفيف أهو يكون مسلى ويطرى القعدة يعنى تعمله مروحة وطبعاً بعد سنين الكلية ما تخلص محدش بيعرف حد وخالتى وخالتك واتفرقت الخالات . أما الولد فبيحور مع كذا نوع من البنات برضه .. يعنى الولد ممكن يحور مع بنت دحيحة عشان ياخد منها ورق المحاضرات والملخصات والبنت بتديله من عنيها الورق على أمل أنهم بتلاقوا فكرياً و يجن ويحبها أو ممكن يحور مع بنت حلوة مزة يعنى أو بنت دمها خفيف عشان تطرى القعدة برضة وجايز يحب واحدة منهم وتقع الفاس فى الراس ... يعنى الكلية ماشية بنظام هزر وحور مع كله لحد ما ربنا يبعتلك اللى يخليك تبطل كله ..... المهم أنه بسبب وجود فراغ عاطفى لدى الشباب أصبحت الجامعة مش مكان للتعليم ولكن للحوارات
ودلوقتى عرفنا ليه جامعات مصر مش موجودة فى تصنيف أحسن مائة جامعة فى العالم زى إسرائيل
وسلامى فى النهاية إلى أم الدنيا مصر طول عمرى مش عارف إزاى أصدق الكلمة دى
سلام يا بلد الكلام
الخميس يوليو 16, 2009 3:40 am